Det er venta hundrevis av småbåtar rundt Slinningsodden i Ålesund laurdag kveld. Alle ventar på høgdepunktet: at Slinningsbålet blir sett fyr på og flammane strekkjer seg mot himmelen.
Det årlege spenningsmomentet er kor lenge det 35 meter høge bålet klarer å stå før det ramlar i bakken.
Rundt 40 ungdommar har jobba sidan starten av mai for å få reist eitt av verdas største sankthansbål – med handmakt.
– Eg synest det er den finaste tradisjonen i Noreg. Det er kjempekjekt å vere her og mange fine folk.
Det seier bålbyggar Tarjei Haugen Stangeland. Han har vore med i mange år, og blei dratt med av broren sin første gongen som tiåring.
Tenner klokka 21
Årets slinningsbål er om lag 35 meter høgt i år og blir tent nøyaktig klokka 21.
Det er venta vind, regn og skodde laurdag kveld, men det legg ingen dempar på gleda til bålgjengen.
– Stemninga er på topp, som alltid. Det blir gøy å sjå bålet brenne ned etter all jobben vi har lagt i.
Bålet er sett saman av pallar, og dei blir lempa oppover frå mann til mann.
– Det er tungt arbeid. Du blir sliten viss du står i veggen eller trappa i fleire timar. Det er kjekt å kjenne at du jobbar. Det skal byggast for hand, seier bålbyggar-kollega Magnus Silset.
Det er strenge restriksjonar rundt bålet for å unngå ulykker etter at det er tent. Brannvesenet i byen er aldri langt unna.
Klarer dei å berge tradisjonen?
Det første bålet på Slinningsodden blei tent i 1964. Før var det fleire konkurrerande bål i byen, men no er det berre Slinningsbålet igjen.
Bålgruppa er inne i eit generasjonsskifte, og har dei siste åra slite med å få like mange frivillige som før.
Men det er stadig mange som samlar seg for å sjå bålet brenne. Dronning Sonja har besøkt Slinningsbålet i Ålesund fleire gonger, og mange turistar har måpande fått med seg den spesielle tradisjonen.
Både koreanske og tyske filmteam har sikra seg bilde av det særmerkte fyrtårnet av eit bål.
Langs resten av norskekysten blir det etter planen tent tusenvis av små bål tysdag, 23. juni. Det er den ordentlege sankthanskvelden.